Ըստ Զուրաբյանի` Հրայր Թովմասյանը զբաղված է տառակերությամբ

ԱԺ նախագահ Հովիկ Աբրահամյանի մոտ` ՀՀ վարչապետ Տիգրան Սարգսյանի, Արդարադատության նախարար Հրայր Թովմասյանի եւ ՀԱԿ պատգամավորներ Նիկոլ Փաշինյանի եւ Լևոն Զուրաբյանի մասնակցությամբ խորհրդակցությունն արդեն ավարտվել է: Լրագրողների հետ զրույցում Լևոն Զուրաբյանը հայտնեց, որ Հրայր Թովմասյանն արել է օրենքի այնպիսի մեկնաբանություն, որը հակասում է իրավունքի սկզբունքներին, Սահմանադրությանը և օրենքներին:

Պատգամավորի խոսքով` արդարադատության նախարարը փորձել է մեկնաբանել օրենքն այնպես, իբրև ազատ ելումուտի իրավունքը չի ներառում տեսակցություն կոնկրետ ձերբակալված անձի հետ, մինչդեռ տեսակցելն այդ իրավունքի մի տարրն է կամ բաղադրիչը:

«Նա որևէ կերպ չկարողացավ ապացուցել իր տեսակետը: Մենք համարում ենք, որ կառավարությունը խախտում է պարզ օրենքով սահմանված իրավունքը»,- ասաց Լևոն Զուրաբյանը` հավելելով, որ անելու են ամեն ինչ, որ այդ ապօրինությունը հաղթահարվի: Նրա խոսքով` եղավ ոչ թե օրենքի տարընթերցում, այլ դրա իմիտացիա Հրայր Թովմասյանի կողմից:

Պատգամավորի կարծիքով` կառավարության անդամը զբաղված է տառակերությամբ և պատգամավորներին խոչընդոտելով: Նա նաև նշեց, որ այն կատաղի դիմադրությունը, որով փորձում են ապացուցել պատգամավորների տեսակցության սահմանափակումը, վկայում է, որ իսկապես բռնություններ են կիրառվել ձերբակալվածների նկատմամբ: