Բուդաղյանների գործը ձգձգում են մինչև օգոստոսի կեսերը, որ բոլորը հանգստի մեկնած լինեն

2013 թվականի հունիսի 1-ին Սուրիկ Խաչատրյանի տան մոտ տեղի ունեցած դեպքի քրեական գործը դեռ ընթացքի մեջ է, թեև հիմա բոլորի ուշադրությունը սևեռված է Սյունիքի մարզպետի մեքենայի ուղղությամբ կրակելու գործի վրա: Այսօր լրագրողների հետ հանդիպման ժամանակ ասաց երկրորդ գործով մեղադրյալ Արա Բուդաղյանի փաստաբան Հայկ Ալումյանը:

Ըստ նրա` Սուրիկ Խաչատրյանի տան մոտ տեղի ունեցածի գործը ոչ միայն չի ավարտվել, այլև ակտիվ փուլում է: «Անհասկանալի պատճառներով  գործի քննությունն արհեստականորեն հետաձգվել է մինչև օգոստոսի կեսերը: Հավանաբար, այդպես են արել, քանի որ այդ ընթացքում մամուլն ավելի պասիվ է, մարդիկ էլ գնում են հանգստի, և բոլորի ուշադրությունն այլ խնդիրների վրա է: Կարծում եմ` պատրաստվում են հերթական անարդար որոշումը կայացնել, որը հնարավորինս անարձագանք կմնա»,- ասաց փաստաբանը: