ԵՄ-ն Թուրքիայի համար կմնա երազ. Հոլանդիայի խորհրդարանի պատվիրակություն

ԵՄ-ին անդամակցելու ցանկություն հայտնած Թուրքիայի ձեռնարկած քայլերը հետաքննելու նպատակով 5-օրյա այցով Թուրքիա ժամանած հոլանդական խորհրդարանական պատվիրակությունը ասել է. «Այս պայմաններում ԵՄ-ն Թուրքիայի համար կմնա երազ»:

Haberler.com-ը հայտնում է, որ Գեզի այգու դեպքերի ընթացքում ցուցարարների դեմ կիրառված բռնի ուժը ակնհայտ է եղել:

Հոլանդիայի խորհրդարանի Քրիստոնեա-դեմոկրատական խմբակցության անդամ Փիթեր Օմսիշտը ասել է. «Եթե ցուցարարների նկատմամբ բռնի ուժ եք կիրառում, ռետինե փամփուշտներից մարդիկ են զոհվում, ապա սա անկախ հանձնաժողովների կողմից պետք է քննարկվի: Եվրոպայում այսպես է արվում»:

Օմսիշտը անդրադարձել է նաև Թուրքիայում ժողովրդավարության, արդարադատության և օրենքի գերակայության բացակայության հարցերին` նշելով նաև, որ Թուրքիայում ազատ մամուլի բացակայություն կա:

Հոլանդացի պառգամավորն ասել է, որ Եվրոպայի խորհուրդը հետևում է Թուրքիային, և Եվրոպայի մարդու իրավունքների դատարանը Թուրքիան և Ռուսաստանը ճանաչել է ամենաքրեական երկիրներ:

Հոլանդիայի խորհրդարանը նաև պարզաբանում է ակնկալում Թուրքիայից, թե ինչ պատճառով է «սև ցուցակում» հայտնվել թղթակից Բրամ Բերմնեուլենի անունը և ինչու թույլ չեն տալիս նրան աշխատել: