Ռուսաստանը Թուրքիայի իշխանություններին առաջարկել է պատվիրակություն ուղարկել Ղրիմ

Ռուսաստանի Պետդումայի պատգամավոր Նատալյա Պոկլոնսկայան Թուրքիայի իշխանություններին հրավիրել է այցելել թերակղզի՝ նախքան Ղրիմի պլատֆորմի գագաթնաժողովին մասնակցելու որոշում կայացնելը:

Ավելի վաղ Թուրքիայի նախագահ Թայիփ Էրդողանը հայտարարել էր Կիևի «Ղրիմի պլատֆորմին» աջակցելու մասին՝ Ստամբուլում իր ուկրաինացի գործընկերոջ՝ Վլադիմիր Զելենսկիի հետ բանակցություններից հետո: Նրա խոսքով՝ Թուրքիան սատարում է Ուկրաինայի տարածքային ամբողջականությանը և ինքնիշխանությանը, նրա սկզբունքային դիրքորոշումը Ղրիմի «բռնակցումն» չճանաչելն է:

«Թուրքիայի նախագահը չի աջակցել Ղրիմի «բռնակցմանը»: Դա ճիշտ է, ես նույն կերպ չէի սատարի Ստամբուլի «բռնակցմանը»: Այստեղ ստացվում է բառախաղ. ժողովրդի կամքը հանրաքվե է, իսկ բռնի զավթումը՝ բռնակցում: Ինչպիսի հարց, այնպիսի պատասխան»,- գրել է Պոկլոնսկայան իր Telegram ալիքում:

Պատգամավորի կարծիքով՝ Ղրիմի պլատֆորմի գագաթնաժողովին Թուրքիայի մասնակցությունը թերակղզու ճակատագրում ներգրավվածության և հետաքրքրության ցուցադրություն է:

«Բայց նախքան նման կասկածելի իրադարձությանը մասնակցելը, ես խորհուրդ կտայի Թուրքիայի իշխանություններին՝ պատվիրակություն ուղարկել Ղրիմ՝ մարդկանց հետ անմիջական կապ հաստատելու համար, որպեսզի հետագայում նրանք իրենց խաբված չզգան պերճախոս քաղաքական գործիչների կողմից: Ես պատրաստ եմ անձամբ կազմակերպել թերակղզի Թուրքիայից գործընկերներին ուղեկցելը»,- գրել է նա: