Համեստ, ազնիվ, մարդամոտ. Սերժ Սարգսյանը` Տարոն Մարգարյանի մասին

Երեւանի քաղաքապետ Տարոն Մարգարյանի երդման արարողության ժամանակ նախագահ Սերժ Սարգսյանը շնորհակալություն հայտնեց երեւանցիներին Տարոն Մարգարյանին վստահելու համար եւ նշեց, որ այդ վստահությունը գալիս է այն բանից, որ նախորդ տարիներին «համեստ, ազնիվ, մարդամոտ եւ Երեւանի խնդիրներով մտահոգ քաղաքապետ եղավ»:

ՀՀ նախագահը հայտարարեց, որ բոլոր ընտրությունններից հետո գալիս է տքնաջան աշխատանքի պահը, եւ ինքը համոզված է` ճիշտ ժամանակն է, որ Տարոն Մարգարյանը եւ նրա թիմակիցներն ավելացնեն իրենց եռանդն ու ջանքերը, որպեսզի զարգացնեն այն որակները, ինչի մասին արդեն խոսեց: Նա համոզված է`Երեւանում չկան անլուծելի եւ լուծելի խնդիրներ, կան դժվար լուծվող եւ աշխատանքով լուծվող խնդիրներ: «Ես համոզված եմ, որ առաջիկա չորս տարիներին չի լինելու անբարեկարգ բակ: Գոնե երրորդ տարվա վերջին Տարոն Մարգարյանը բարձրաձայն կարող է ասել, որ անխնամ եւ անբարեկարգ բակ այլեւս չկա»,- նշեց նախագահը եւ հույս հայտնեց, որ նորընտրիր քաղաքապետը Երեւանը կդարձնի «ավելի հարմարավետ, ավելի հաճելի եւ ավելի գեղեցիկ»: