Հովիկ Աբրահամյանը սխալվել է

ԱԺ ՀՀԿ խմբակցության ղեկավար Գալուստ Սահակյանը համամիտ չէ ընդդիմության այն գնահատականներին, որ իշխանությունները չեն ցանկանում Մարտի 1-ի բացահայտումը: Այս մասին Սահակյանը հայտնեց Yerkir.am-ի հետ զրույցում եւ նշեց, որ խոսքը խաղի կանոններին է վերաբերում, պետք է լինեն այնպիսի խաղի կանոններ, որոնք քաղաքական շոուների չվերածվեն: «Մենք չենք ուզում ընդդիմադիրների շոուներին մասնակից դառնալ»,- հայտարարեց նա:

Դիտարկմանը, որ, ըստ ՀԱԿ ներկայացուցիչների, ուժային որոշ մարմինների ներկայացուցիչների կողմից ճնշումներ են եղել, որի արդյունքում էլ ՀՀԿ-ն դրժել է օրինագիծն անցկացնելու խոստումը, Սահակյանը արձագանքեց. «Ինձ վրա ի՞նչ ճնշումներ կարող են լինել»:

ԱԺ ՀՀԿ խմբակցության ղեկավարից հետաքրքրվեցինք նաեւ, թե պարզե՞լ է` ինչու  է ԱԺ նախագահ Հովիկ Աբրահամյանը «ձեռնպահ» քվեարկել Մարտի 1-ի ժամանակավոր հանձնաժողովի ստեղծմանը: Պարզվում է, ըստ Գալուստ Սահակյանի, դա պատահականություն է եղել, Հովիկ Աբրահամյանը սխալվել է: «Այն խնդիրը, որ մեր առջեւ դրել էինք` որ նախագիծը պետք է չանցնի, լուծվել է: Այո, հստակ խնդիր էր դրված, ես հավաքել եմ եւ ասել, որ «դեմ» ենք քվեարկում»,- հայտարարեց Սահակյանը: Նա թեեւ խոստովանում է, որ հանձնաժողով ստեղծելու պայմանավորվածություն եղել է, բայց չեն ասել, «որ ով ինչ ուզի` այդ փաստաթղթում գրի»: