Փնտրում էի ամենալավ ջութակահարին, գտա Սամվել Երվինյանին. Յաննի

Ապրիլի 20-ին եւ 21-ին հայտնի երաժիշտ Յաննին համերգով հանդես կգա Կ.Դեմիրճյանի անվան մարզահամերգային համալիրում:

Լրագրողների հետ հանդիպման ժամանակ Յաննին նշեց, որ հայտնի է` իր նվագախումբը կազմված է տարբեր ազգերի ներկայացուցիչներից, ինչն իրեն դուր է գալիս: Նա վստահեցնում է, որ աշխարհում փնտրել է լավագույն երաժիշտներին, քանի որ հավատում է` բազմազանությունն ուժ ունի:

«Ես փնտրում էի աշխարհի ամենալավ ջութակահարին եւ գտա Սամվել Երվինյանին: Ինձ համար երաժշտի ազգությունը կապ չունի, բայց, անկեղծ ասած, ինձ դուր է գալիս այն փաստը, որ Սամվելը հայ է»,- ասաց Յաննին` հավելելով, որ կխնդրի Երվինյանին, որ հայ հանդիսատեսի համար համերգին հատուկ ինչ-որ բան մտածի:

Խոսելով հայկական դուդուկի մասին`ասաց, որ ինքն այն շատ է սիրում, քանի որ դուդուկը զգացմունքային գործիք է: