Սիրիայի ճգնաժամի ռազմական լուծումը կբազմապատկի սարսափները. Սերգեյ Լավրով

Որքան շատ մեկուսացվի Բաշար Ասադի վարչակազմը, այնքան մեծ կլինի սպառնալիքը Սիրիայում. այսօր Ստամբուլում հայտարարել է ՌԴ արտգործնախարար Սերգեյ Լավրովը:

«Սիրիական ճգնաժամի հետեւանքները սարսափելի են` մարդկային զոհեր, տառապանքներ, հումանիտար ճգնաժամ: Հուսով եմ` այստեղ կգերակշռեն բանականությունը, պրագմատիզմը, սիրիացի ժողովրդի շահերը»,- ըստ ИТАР-ТАСС-ի` ասել է նա:

Նախարարը նշել է, որ այդ գործընթացի որոշ կարեւոր մասնակիցներ վստահեցնում էին, թե ուղիներ կփնտրեն երկխոսության համար: «Հուսով եմ` դա տեղի կունենա»,- ընդգծել է Լավրովը` հավելելով, որ Ռուսաստանը ձգտում է հասնել այն բանին, որ Դամասկոսը կատարի իր խոստումները, առաջնորդվի Ժնեւյան համաձայնագրով:

«Եթե իրադրությունը հանձնենք նրանց, ովքեր խաղադրույք են կատարում ռազմական որոշման վրա, ապա այն սարսափները, որոնք կան, կբազմապատկվեն, նաեւ կմեծանա ահաբեկիչների ազդեցությունը տարածաշրջանում»,- ընդգծել է ՌԴ արտգործնախարարը: