ԱՄՆ-ն Եվրոպային մղում է խոր ճգնաժամի. Սերգեյ Լավրով

ԱՄՆ-ն Եվրոպային մղում է էներգետիկ և պարենային խոր ճգնաժամի: «RT India»-ին տված հարցազրույցում այս հայտարարությունն է արել ՌԴ արտաքին գործերի նախարար Սերգեյ Լավրովը:

«Եվրոպան՝ որպես գաղութատիրության հայրենիք, իհարկե, արդեն կորցրել է իր կարողությունները: Հիմա այդ կարողությունները լիարժեք դրսևորում է ԱՄՆ–ն, որը Եվրոպային մղում է խոր ճգնաժամի՝ թե՛ էներգետիկ, թե՛ պարենային: Եվրոպան հավանաբար ամենաշատը կտուժի Հորմուզի նեղուցի ճգնաժամից: Էլ չենք խոսում այն մասին, որ ռուսական գազ և ռուսական նավթ գնելու արգելքը նշանակում է անցում ամերիկյան հեղուկացված բնական գազի գնման, որն անհամեմատ թանկ է»,- նշել է Լավրովը:

Նախարարի խոսքով՝ եվրոպական երկրների բյուջեները կծանրաբեռնվեն նաև սրանով՝ ի հավելումն այն հարյուր միլիարդավոր եվրոների, որոնք Եվրոպան լցնում է Ուկրաինա, որպեսզի վերջինս շարունակի եվրոպական ագրեսիան ՌԴ-ի դեմ:

Լավրովը նշել է` հետաքրքիր է իմանալ՝ արդյոք եվրոպական երկրների իշխանություններն իրենց խորհրդարաններին ներկայացնո՞ւմ են վիճակագրություն այն մասին, թե որքան թանկ է Եվրոպայի համար էներգիան, որն այժմ ստանում են բոլորովին այլ աղբյուրներից՝ էժան ռուսական ածխաջրածինների փոխարեն: