Զորանոցային վիճակ. ՛՛Հրապարակ՛՛

«Բոլոր այն մարդիկ, ովքեր գտնվում են իշխանության մեջ եւ ցանկանում են քննադատել իրենց վերադասներին, պարտավոր են դիմում գրել, ներկայացնել հրաժարական, այնուհետև գնալ, քշտել թևքերը և անխնա քննադատել բոլորին: Սա իրենց իրավունքն է»,- ասուլիսում հայտարարել էր Սերժ Սարգսյանը:

«Արդյոք այս հայտարարությունը համատեղելի՞ է իրեն դեմոկրատական երկիր հռչակած, սովետական անցյալին հրաժեշտ տված, բազմակարծություն որդեգրած երկրի սկզբունքների հետ: Այդպիսի միակարծություն, երբ կարծիքի իրավունք ուներ միայն վերադասը՝ լիներ կոլխոզի նախագահ, ռայկոմի քարտուղար թե պալիտբյուրոյի ղեկավար, մենք արդեն տեսել ենք: Եվ սովետ երկրի քանդվելու պատճառներից մեկն էլ խոսքի ու կարծիքի ազատության բացակայությունն էր: Այն հեղձուցիչ մթնոլորտը, երբ մարդիկ խոհանոցներում դժգոհում էին, իսկ հրապարակներում «ուռռա» բղավում: Մինչդեռ մարդիկ որքան իրար նման են, նույնքան էլ տարբեր են, ուստի չեն կարող միանման մտածել և տարբեր հարցերի շուրջ տարաձայնություններ չունենալ:

Եվ, վերջապես, ինչո՞ւ պետք է իշխանության մեջ գտնվողները վախենան իրենց կարծիքը հայտնելուց եւ վերադասին քննադատելուց: Գուցե հենց այդ զորանոցային «հավսար-զգաստի» վիճակն է այն «գաղջ» մթնոլորտի պատճառը, որի մասին խոսում էր ինքը՝ Սերժ Սարգսյանը, և որը, այո, նկատում են բոլորը: Եթե վերադասին քննադատելը մեզանում արգելված է, ինչպե՞ս կարող են առողջ բանավեճեր ընթանալ իշխանության ներսում, սխալ որոշումները կանխվել: Հենց նման մթնոլորտում չի՞ ձևավորվում անձի պաշտամունքը, քծնանքը, պնակալիզությունը: Եվ այդ մթնոլորտը չէ՞ պատճառը, որ սխալ պատկեր են ներկայացնում երկրի նախագահին, համոզում, որ «պրոբլեմ չկա», որ հասարակությունը գոհ է ու երջանիկ, իսկ երկիրը ծաղկում է ու բարգավաճում»,- գրում է «Հրապարակ»-ի խմբագրականը: