Խաչատրյանը, Շահգալդյանը եւ Ղահրամանյանը կշարունակեն պաշտոնավարել

Սյունիք մարզպետ Սուրեն Խաչատրյանը, Կոտայքի մարզպետ Կովալենկո Շահգալդյանը, Գեղարքունիքի մարզպետ Ռաֆիկ Գրիգորյանը ՀՀԿ Խորհրդի եւ ԳՄ նիստերից հետո բավականին բարձր տրամադրությամբ դուրս եկան ՀՀԿ Կենտրոնական գրասենյակից:

Yerkir.am-ի հարցին ի պատասխան, թե` մարզպետերի պաշտոնանկությունների հարցը քննարկվե՞ց, Սուրեն Խաչատրյանը վստահեցրեց, որ նման հարց չի քննարկվել: Իսկ թե օրակարգում ի՞նչ հարցեր էին, մարզպետը պատասխանեց. «Օրակարգում բոլորը նորմալ հարցեր էին: Դավիթ Հարությունյանը ներկայացրեց բոլոր խնդիրները, դիտորդական առաքելությունների եզրակացությունները, արձանագրված գործերը»:

Սուրեն Խաչատրյանը վստահեցրեց, որ նախագահի տրամադրությունը շատ բարձր էր, որեւէ մեկի վրա էլ զայրացած չէր:

Կոտայքի մարզպետ Կովալենկո Շահգալդյանն էլ նախ նշեց, որ տրամադրությունը շատ բարձր է: Մեր թղթակի հարցին, թե` նախագահն ուզո՞ւմ է, որ մարզպետը շարունակի պաշտոնավարել, Շահգալդյանը պատասխանեց. «Այո, նախագահն ուզում է, որ շարունակեմ աշխատել»:

Գեղարքունիքի մարզպետ Ռաֆիկ Գրիգորյանը եւս հայտարարեց, որ շարունակելու է պաշտոնավարել: Նա վստահեցրեց, որ նախագահը որեւէ մեկին նկատողություն չի արել, բոլորի աշխատանքից էլ գոհ է:

Իր աթոռից չի զրկվի նաեւ Արմավիրի մարզպետ Աշոտ Ղահրամանյանը: Նա նույնպես հայտարարեց, որ նախագահն իր աշխատանքից գոհ է: Ուշագրավ է, որ մինչեւ ՀՀԿ կենտրոնական գրասենյակ մտնելը, մինչեւ նիստի մեկնարկը Ղահրամանյանն ակնհայտորեն անտրամադիր եւ մտահոգ էր, իսկ արդեն նիստի ավարտին տրամադրությունը բավականին բարձր էր: