Բագրատյանը Զուրաբյանին աշխատանքի չի ընդունել. ''Հրապարակ''

Մինչ այս պահը ՀԱԿ-ի՝ Հրանտ Բագրատյանին սատարող ուժերը դեռեւս ձեռնպահ են մնում այդ մասին հայտարարելուց, չնայած թե «Ազատ դեմոկրատները», թե Կանաչների կուսակցությունը, ինչպես նաեւ ՀԺԿ-ն ու «Հանրապետությունը», այդ թվում եւ ՀՀՇ-ի մի մասը' Երջանիկ Աբգարյանի, Հովհաննես Իգիթյանի գլխավորությամբ, սատարելու են նրան: Ինչ վերաբերում է բուն ՀԱԿ-ի պահվածքին, ապա այնտեղ, ինչպես հայտարարել է Զուրաբյանը, քվեաթերթիկներն անվավեր դարձնելու իդեա-ֆիքսն է իշխում:

Իր աղբյուրներին հղում անելով՝ այս մասին գրում է «Հրապարակ»-ը եւ հավելում. «Ինչպես տեղեկացնում են ՀԱԿ աղբյուրները, Բագրատյան-Զուրաբյան հարաբերությունները չեն փայլել դեռեւս իրենց իշխանություն եղած ժամանակներում: Ի դեպ, ըստ մեր աղբյուրների, երբ Բագրատյանն աշխատում էր Պեռնո-Ռիկարի կոնյակի գործարանում, որպես փոխնախագահ-տնօրեն, Լեւոն Տեր-Պետրոսյանը դիմել է Բագրատյանին, որպեսզի վերջինս աշխատանք չունեցող Լեւոն Զուրաբյանին  ընդունի որպես մամլո քարտուղար: Բագրատյանը, սակայն, չի կատարել վերջինիս խնդրանքը: Զուրաբյանին օգնության է հասել ԱԳ նախկին նախարար Վահան Փափազյանը' առաջարկելով Սաբինա Ֆրեյզերին' Միջազգային ճգնաժամային խմբի տարածաշրջանային տնօրենին, որպես փորձագետ, Զուրաբյանին ընդունել աշխատանքի»: