Շարմազանովը Զուրաբյանին հիշեցրեց, որ ԲՀԿ-ն այլընտրանք է եւ ոչ՝ ընդդիմություն

ԱԺ նիստում ՀԱԿ խմբակցության ղեկավար Լևոն Զուրաբյանը, խոսելով կառավարության ներկայացրած օրենսդրական փաթեթի մասին, որը վերաբերում է սահմանամերձ համայնքներին հարկային արտոնություններ տալուն, քննադատեց քաղաքական մեծամասնությանը` ասելով, որ արհեստականորեն հետ է մղվում ընդդիմության ստորագրություններով արտահերթ հարցի քննարկումը:

ԱԺ փոխնախագահ Էդուարդ Շարմազանովը, մինչ խոսքը կտար ԱԺ ԲՀԿ խմբակցության պատգամավոր Միքայել Մելքումյանին, հարկ համարեց հակադարձել Լևոն Զուրաբյանին. «Ասում եք` 44 ստորագրություն եք հավաքել, այլընտրանքի շնորհիվ եք հավաքել, էլի: Չլիներ այլընտրանքը, որտեղի՞ց էիք հավաքելու ստորագրություններ: Իսկ ԲՀԿ-ն միշտ հռչակել է իրեն այլընտրանք, այլ ոչ` ընդդիմություն»:

ԲՀԿ-ական Միքայել Մելքումյանը, մոտենալով ամբիոնին, ասաց. «Պարո'ն Շարմազանով, շատ ակտիվ եք Ձեր գնահատականներում, բայց չգիտեմ, թե Ձեր երկսայրի գնահատականներն ավելի շատ ում են ուղղված»: