ՀՐԱՊԱՐԱԿ. Մենք մեր անձերն ունենք

ՀՅԴ ԳՄ ներկայացուցիչ, ԱԺ պատգամավոր Արմեն Ռուստամյանը «Հրապարակ» օրաթերթին տված հարցազրույցում անդրադարձել է Ռոբերտ Քոչարյանի` քաղաքականություն վերադառնալու մասին խոսակցություններին: Նա նշել է, որ Քոչարյանն այժմ Դաշնակցության հետ շփում չունի, եւ հանրապետության երկրորդ նախագահին սատարելու առաջարկություն ՀՅԴ-ն չի ստացել: «Մենք ունենք մեր պլատֆորմը, մենք ունենք մեր քաղաքական ուղեգիծը մշակված, եւ եթե դա կընդունեն, կհամագործակցենք, չեն ընդունի` չենք համագործակցի: Ով ուզում է լինի»,- ասել է Արմեն Ռուստամյանը:

- Ի վերջո, ո՞րն է լինելու ՀՅԴ-ի դերակատարություը 2012, 2013 թ. ընտրություններում:

- Ամբողջական իշխանափոխություն իրականացնելը:

- Իսկ դավադրության տեսությանը հավատում ե՞ք, որ վերջերս շրջանառության մեջ դրվեց, թե դավադրություն է եղել, Ռոբերտ Քոչարյանն ուզել է վերադառնալ ոմանց միջոցով:

- Դավադրություններին հավատում եմ, տեսությանը` չէ: Դրանք բոլորը բամբասանքներ են, ոչ հաստատուն հիմքերի վրա կատարված բաները ես չեմ մեկնաբանում: Ես փաստերին եմ հետեւում, քաղաքական օրինաչափություններին, եւ քաղաքական գործիչն իրավունք չունի ասեկոսեներով շարժվելու: