«Իրանք պրովոկացիա են անում, որ մենք պատասխանենք, բայց մենք հո պատերազմ չե՞նք սկսելու, մենք էդքան խելք ունենք»

Այսօր ԱԺ ՀՀԿ խմբակցության պատգամավոր, գեներալ Սեյրան Սարոյանն անդրադարձել է երեկ ղարաբաղա-ադրբեջանական սահմանին տեղի ունեցած աննախադեպ սադրանքին, որն իրականացրել է Ադրբեջանը` խոցելով զորավարժանքներին մասնակցող հայկական ուղղաթիռը:

Սեյրան Սարոյանը ցավակցեց զոհված սպաների հարազատներին: «Ցավակցում եմ մեր զոհված տղերքին, նրանք ընդամենը իրենց ծառայությունն էին կատարում: Բայց թուրքը մնում է թուրք: Ես մտածում եմ, որ դա նրանց վախից էր` երևի վախեցել են, թե դա հարձակում է: Տենց բան չի կարա լինի, որովհետև մենք հաղթած պետություն ենք: Թուրք են, էլի, ու վախից են ասում, թե իբր մենք հարձակում ենք գործել»,- ասաց նա:

Դիտարկմանը, որ Ադրբեջանի կողմից ստեղծված լարվածության պատճառով հնարավոր չի լինում դիակները դուրս բերել, Սարոյանն արձագանեց. «Դիակները կբերեն, տենց բան չի եղել, որ մեր բանակը դիակները չկարողանա բերի: Մեր տղերքն էին ափսոս»:

Հարցին, թե ինչպիսի՞ն կլինի հայկական կողմի արձագանքը, գեներալը պատասխանեց. «Դե, ձենը կլսեք, կլսեք: Իրանք պրովոկացիա են անում, որ մենք պատասխանենք, բայց մենք հո պատերազմ չենք սկսելո՞ւ, մենք էդքան խելք ունենք, մենք գիտենք` ինչ ենք անելու»: