Առողջապահության ոլորտում առաջինն ու միակը

Այսօր լրացավ «Առողջապահություն» հանդեսի 55-րդ տարեդարձը:

«Հանդեսը լույս է տեսնում դեռեւս 1956-ից: Այն մեր համակարգում հայերեն լեզվով հրատարակվող առաջին և միակ բժշկագիտական պարբերականն է»,- ասաց ամսագրի գլխավոր խմբագիր Գեղամ Խանդանյանը` հավելելով, որ հանդեսը նպաստում է հանրապետությունում բժշկագիտության զարգացմանը:

Գլխավոր խմբագրի խոսքերով` նախատեսվում է մեծացնել հանդեսի ծավալը, ավելացնել հրատարակման պարբերականությունն ու տպաքանակը. «Ցանկանում ենք ավելացնել բնակչության լայն զանգվածներին հետաքրքրող հոդվածների թիվը, տպագրել հեռավոր մարզերի բուժհաստատություններում աշխատող բժիշկների հոդվածներն ու առաջարկությունները: Նաեւ նպատակ ունենք, որ ամսագիրը հասու լինի հանրապետության ծայրամասերում ապրող գյուղական բնակչությանը»:

ՀՀ առողջապահության նախարար Հարություն Քուշկյանը նշեց, որ 55-ամյա «Առողջապահություն» հանդեսի համար դժվար շրջան են եղել վերջին 20 տարիները. «Սակայն հաղթահարելով բոլոր դժվարությունները` խմբագրության աշխատակազմը կարողացել է ոչ միայն պահպանել հանդեսի գոյությունը, այլև նոր շունչ ու որակ հաղորդել դրան»: