Կովսականում մանկապարտեզ է կառուցվում

ԼՂՀ վերաբնակեցվող շրջաններում նոր ներդրումներ են կատարվում:

Քաշաթաղի շրջանի Կովսական համայնքում անցած ամիս սկսել են մանկապարտեզի շենքի կառուցման աշխատանքները։ Շինարարների հավաստմամբ՝ մանկապարտեզը պատրաստ կլինի հաջորդ տարի։ Անհրաժեշտ 154 մլն դրամը պետությունն է հատկացրել: Այդ գումարով կկառուցվի մանկապարտեզի շենքը եւ կբարեկարգվի շրջակայքը, այդ թվում՝ մարզադաշտը։

«Այս տարի 20 մլն դրամի աշխատանք է նախատեսված, կհասցնենք միայն պատերը շարել»,- Արցախի հանրային հեռուստաստեսության լրագրողի հետ զրույցում նշել է շինարարությունն իրականացնող ընկերության տնօրենը։

Նախակրթարան կհաճախեն նաեւ մոտակա Ալաշկերտ եւ Մուշ համայնքների երեխաները։ Այն նախատեսված է ավելի քան 50 փոքրիկների համար:

Կովսականի համայնքի ղեկավար Ռազմիկ Մարգարյանի խոսքերով՝  գյուղում նախադպրոցական տարիքի 80 երեխա կա, իսկ ծնունդների քանակի ավելացմանը զուգահեռ հնարավորություն կունենան նաեւ մանկապարտեզի երկրորդ հարկը կառուցել։