Կովսականում բացվել է Թաթուլ Կրպեյանի կիսանդրին

Լեռնային Ղարաբաղի Կովսական քաղաքում ազգային հերոս Թաթուլ Կրպեյանի անվան դպրոցի բակում տեղադրվել է   նրա կիսանդրին:

Դպրոցը հերոսի անունով անվանակոչվել էր դեռ 2000 թվականին, իսկ կիսանդրու բացումը Թաթուլի մարտական ընկերների երազանքն էր:

 Որ հենց ազատագրված տարածքում եւ իր անունը կրող դպրոցում պետք է տեղադրվի հերոս Թաթուլի արձանը՝ որոշել են նրա մարտական ընկերները: Արմեն Շահվերդյանը Թաթուլ Կրպեյանի զինակիցն է եղել ե՛ւ կյանքում, ե՛ւ արցախյան գոյամարտի ընթացքում: Ուսանողական տարիներին միասին ապրել են հանրակացարանի նույն սենյակում, միասին սովորել համալսարանի պատմության ֆակուլտետում, միասին անդամագրվել Դաշնակցությանն ու միասին էլ մեկնել ճակատ: «Միասինների» շղթան խախտվեց 1990-ի ապրիլի 30-ին, երբ Թաթուլը քաջի մահով ընկավ  «Օղակ» գործողության ժամանակ: Հենց այդ օրն էլ բոլոր ընկերներն ուխտեցին իրենց զավակներին Թաթուլի անունով կոչել:

 Կրպեյան ընտանիքի անդամները Կովսականի դպրոցին որպես նվեր հանձնեցին գրքրեր, այդ թվում՝ Թաթուլի բանաստեղծությունների ժողովածուն:

ԵրկիրՄեդիա հեռուստաընկերությունն է ներկա եղել ազգային հերոսի կիսանդրու բացմանը: