Վրացիները Անիում էլ են "վրացական" եկեղեցի գտել (տեսանյութ)

Կովկասյան առաջին տեղեկատվականը` ՊԻԿ-ը, որը հեռարձակվում է Թբիլիսիից` ռուսերեն լեզվով, տեսանյութ է ներկայացրել Հայաստանի հին մայրաքաղաք Անիի մասին. տեղեկացնում է «Երկրամասը»:

Տեսաֆիլմում նշվում է, որ Հայաստանի հոգեւոր եւ մշակութային երբեմնի կենտրոնը, որը ներկայումս Թուրքիայում է, դուրս է մնացել տեղի իշխանությունների ուշադրությունից. «բաց երկնքի տակ թանգարանում» այսօր արածում են ոչխարներ: Տեղեկացվում է նաեւ, թե քաղաքի ավերակներում նաեւ վրացական եկեղեցի կա` վրացի եւ հայ սրբերի որմնապատկերներով:

Որպես վրացական ներկայացվում է Սբ Գրիգոր եկեղեցին, որը 1215 թվականին` Զաքարյան իշխանների օրոք, կառուցել է քաղկեդոնականության հետեւորդ, մեծահարուստ անեցի Տիգրան Հոնենցը:

Ակադեմիկոս Հովսեփ Օրբելին նշում է, որ եկեղեցու որմնապատկերներն արվել են նույն ժամանակ, ինչ կառուցվել է եկեղեցին: Եկեղեցու կառուցման մասին արձանագրությունները հայերեն են, սակայն որմնանկարների բացատրությունները` վրացերեն, մասամբ` հունարեն: «Դա էլ առիթ է տվել եկեղեցին կա'մ հունական, կա'մ վրացական կոչելու: Իրականում դա հայկական քաղկեդոնական եկեղեցի է»,- հայտարարում է ակադեմիկոսը: