Ադիբեկյանին չհավատաք. ՀՀԿ պատգամավոր

Նախընտրական շրջանն արդեն սկսվել է, եւ կշահեն քաղաքական այն ուժերը, որոնք ճիշտ կօգտագործեն նախընտրական տեխնոլոգիաները. այսօր լրագրողների հետ հանդիպման ժամանակ ասաց ԱԺ ՀՀԿ խմբակցության անդամ Համլետ Հարությունյանը:

«Զուտ նստացույցերով կամ դասախոսություններով նախընտրական շրջանում առավելության հասնել հնարավոր չէ»,- ասաց պատգամավորը` նկատի ունենալով ՀԱԿ-ին, սակայն չբացառեց այն, որ այս ուժն էլ հաջորդ խորհրդարան մտնելու հնարավորություններ ունի:

Նրա խոսքերով` նախընտրական նորմալ գործունեություն կատարում են խորհրդարանական բոլոր ուժերը` ՀՀԿ, ԲՀԿ, ՕԵԿ, ՀՅԴ եւ «Ժառանագություն»: Իսկ մյուս ուժերը, որոնց անունները չեն տրվում, հիմնականում տեսականորեն են քարոզարշավն անում: Դրանք հիմնականում մարդկային եւ այլ ռեսուրսներ չունեցող կուսակցություններն են:

«Եթե դու ռեսուրսներ չունես, ուրեմն տեսաբան ես»,- ասաց պատգամավորը` չբացառելով նաեւ այն, որ ընտրություններից հետո արդյունքները կարող են բոլորովին այլ լինել, քան ներկայումս ենթադրվում է: Նրա խոսքերով` կարեւորը «ֆինիշն» է. սպորտում միշտ չէ, որ մեկնարկի ժամանակ արագ շարժվածը վերջում էլ է լավագույն ցուցանիշն ունենում:

«Ինչքան հզոր ուժ էլ ուզում է լինի, եթե նորմալ նախընտրական գործառույթներ չանի, չի անցնի. Ադիբեկյանի թվերին չհավատաք»,- ասաց Հ. Հարությունյանը:

Yerkir.am-ի այն դիտարկմանը, թե Ադիբեկյանի հրապարակած թվերը  միշտ հօգուտ ՀՀԿ-ի են, ինչո՞ւ է խորհուրդ տալիս` չհավատալ նրան, պատասխանեց. «Խոսքը կանխատեսումների մասին է: Էսօր ինձ ասում են, որ 50 տոկոս ձայն ունեմ, բայց եթե արխային գնամ, քնեմ, մի երկու ամիս հետո կարող է 0 ձայն ունենամ»: