Կբարձրացնեն Ջուղայի խաչքարերի հարցը

Կրասնոդարում տպագրվող` Ռուսաստանի հայերի «Երկրամաս» թերթը մասնակցելու է ադրբեջանական պետական հեռագրային АзерТАдж գործակալության կազմակերպած` ԱՊՀ երկրների լրագրողների մրցույթին, որի թեման պատմա-մշակութային ժառանգության պահպանությունն է:

Թերթը տեղեկացնում է, որ մրցույթին ներկայացնելու է ներկայիս Ադրբեջանի տարածքում հայկական պատմա-մշակութային ժառանգության ճակատագրի մասին հոդվածաշար, մասնավորապես` ադրբեջանական իշխանությունների կողմից Ջուղայի խաչքարերի բարբարոսական ոչնչացման մասին:

Մրցույթը մեկնարկել է մարտի 12-ին: Դրան ներկայացվող նյութերը ընդունվում են մինչեւ այս տարվա նոյեմբերի 15-ը: Աշխատանքային լեզուն ռուսերենն է:

Մրցութային աշխատանքները գնահատելու է միջազգային ժյուրին, որի կազմում ընդգրկված են ԱՊՀ 5 առաջատար տեղեկատվական գործակալությունների` ИТАР-ТАСС, БЕЛТА, Укринформ, Казинформ и АзерТАдж աշխատակիցներ: Մրցույթի արդյունքներն ամփոփվելու են այս տարվա վերջին: