Մարտահրավեր իրավապահներին

Չնայած ոստիկանությունը, 2009-ից սկսած, իր բոլոր հաշվետվություններում արձանագրել է հանցագործությունների թվի աճ, իրավապահ համակարգի եւ ոչ մի ներկայացուցչի դա առանձնապես մտահոգվելու տեղիք չէր տալիս: Համենայն դեպս, ոչ ոք դրա մասին հրապարակավ չէր արտահայտվում:

Սակայն բավական էր, որ գործող ու նախկին բարձրաստիճան պաշտոնյաների սեփականության նկատմամբ մի քանի ավազակային հարձակումներ տեղի ունենային, որպեսզի գլխավոր դատախազը հրապարակավ ստեղծված իրավիճակի կապակցությամբ անհանգստություն հայտներ: Փաստորեն, անպայման պետք է հարձակման թիրախ դառնար «վերնախավը», մերօրյա «էլիտան», որի սեփականության ապահովագրվածությունն առ այսօր եղել է անվերապահորեն երաշխավորված, որպեսզի վերջապես իրավապահ համակարգը սթափվեր:

Ժամանակն է վերջապես խոստովանելու, որ հանցագործությունների աճը երեք տարի շարունակ չի կարող պայմանավորված լինել միմիայն բոլոր հանցագործությունները գրանցելուն ուղղված քաղաքականությամբ, ինչում համառորեն փորձ էր արվում համոզել հանրությանը: Նման տիպի մոլորությունը, որին ոստիկանությունն ինքն էր սկսել հավատալ, ստեղծված իրավիճակի հիմնական պատճառներից մեկն է: