Խեղճ մարդուն չեն թողնում` մեռնի

«Ա'յ մարդ, ի՞նչ եք ուզում, թողեք մեռնեմ, էլի՜: Մի հրաման չի՞ եղածը, ստորագրեք, որ մեռնեմ»,- բանտախցում նստած միտք է անում Իրաքի նախկին փոխվարչապետ և արտաքին գործերի նախարար Թարիք Ազիզը:

Նա 2010 թ. հոկտեմբերին դատապարտվել էր մահապատժի՝ 1999 թվականին շիաների նկատմամբ հաշվեհարդար տեսնելու համար, եւ մինչ օրս սպասում է վճռի իրականացմանը: Սակայն Ազիզի համբերության բաժակը լցվել է, եւ նա խնդրել է արագացնել իր դատավճիռը. տեղեկացնում է lenta.ru-ն:

Ազիզի հոգեվիճակն այնքան ծանր է, որ նա անգամ դատավճիռն արագացնելու խնդրանքով դիմում է գրել Իրաքի վարչապետ Նուրի ալ Մալիքիին:

74-ամյա Թարիք Ազիզը Սադամ Հուսեյնի մերձավորներից էր և նրա շրջապատի միակ քրիստոնյա պաշտոնյան: 2003 թ. ապրիլին Ազիզն ինքնակամ հանձնվել էր Իրաքի ամերիկյան հրամանատարությանը։