Ով փող չունի` գնա-մեռնի՞

Հիվանդն առանց բժշկի ցուցումների չպետք է օգտագործի բուժիչ ջրեր, իսկ առողջ մարդը պետք է օգտագործի միայն սովորական խմելու ջուր. այսօր լրագրողների հետ հանդիպման ժամանակ խորհուրդ տվեց ՀՀ առողջապահության նախարարության կուրորտաբանության և ֆիզիկական բժշկության գիտահետազոտական ինստիտուտի բուժական գծով փոխտնօրեն Մկրտիչ Կրապսկին:

Խոսելով կուրորտաբանության խնդիրների մասին` նա նշեց, որ դրանք հիմնականում վերաբերում են հիմնարկների լիցենզավորմանը, սարքավորումների հագեցվածությանը, աշխատանքի որակի վերահսկողությանը:

«Գոյություն ունի Ջերմուկ և Ծաղկաձոր քաղաքների զարգացման ծրագիր, որն ուղղված է հենց այդ խնդիրների լուծմանը»,- տեղեկացրեց Մ. Կրապսկին` ավելացնելով, որ կուրորտային հիմնարկներում բուժվելու առավել մեծ պահանջ ունեն սոցիալապես խոցելի խավի ներկայացուցիչները` մեծահասակները, հաշմանդամները, սակայն հիմնարկ ավելի շատ այցելում են նրանք, ովքեր փող ունեն:

Կրապսկին առաջնային խնդիր է համարում հանքային բուժիչ ջրերի ճիշտ օգտագործումը, որը չի հանգեցնի երիկամային քարերի առաջացման ու թունավորումների:

Նշենք, որ ըստ հիվանդությունների բուժման` հանքային ջրերը դասակարգվում են 3 խմբերի` մարսողական օրգանների, սիրտ-անոթային և հորմոնային համակարգի: