Հայ պատգամավորներին արգելել են ելույթ ունենալ

Հուլիսի 24-ին Ջավախքում Վահան Տերյանին նվիրված միջոցառման ընթացքում Հայաստանի խորհրդարանի պատգամավորներ Արծվիկ Մինասյանին եւ Արմեն Մարտիրոսյանին թույլ չեն տվել ելույթ ունենալ եւ բարձրաձայնել ջավախահայության խնդիրների մասին:

«Ջավախքը գնում է ազգային դիմագիծը կորցնելու ճանապարհով, եւ դրան նպաստում են թե' վրացական իշխանությունների հայաթափման քաղաքականությունը, թե' հայկական իշխանությունների կրավորական կեցվածքը, այս միջավայրում նաեւ` առանձին անձանց անձնական շահերով պայմանավորված ձգտումը` օգնել հայաթափման գործընթացին»,- ասաց ՀՅԴ պատգամավոր Արծվիկ Մինասյանը:

Դրան նպաստել են նաեւ տարածաշրջանի հայ ղեկավարների` մեծամասնական պատգամավոր Հենզել Մկոյանի, Վան Բայբուրդի, շրջանային վարչության ղեկավար Վոլոդյա Ստամբուլցյանի պահվածքը, որոնք, ըստ հայ պատգամավորների, գործել են Վրաստանի ազգային անվտանգության ծառայության աշխատակիցների թելադրանքով:

«Ժառանգություն»-ից Արմեն Մարտիրոսյանն էլ ուշադրություն հրավիրեց այն հանգամանքին, որ «ռուսատյաց» վրացիները Ջավախքում Տերյանին նվիրված միջոցառումն անցկացրել են ռուսաց լեզվով: