Սոցիալապես անապահով երեխաների ամառային հանգիստը

Հուլիսի 1-ից մարզերի երեխաների հետ Հանքավանի և Ծաղկաձորի ճամբարներում իրենց հանգիստն են անցկացնում նաև մայրաքաղաքի սոցիալապես անապահով ընտանիքների շուրջ 800` 7-14 տարեկան երեխաներ. տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:

Օրերս Հանքավանի մի շարք ճամբարների երեխաների մասնակցությամբ ճամբարներից մեկում կազմակերպվել էր փառատոն-երեկույթ՝ նվիրված քաղաքամայր Երևանին:

Քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը Երևանի քաղաքապետ Կարեն Կարապետյանի անունից ողջունել է մասնակիցներին եւ հանձնել մարզական խաղերն ու մարզագույքը:

«Սոցիալապես անապահով ընտանիքները քաղաքապետարանի մշտական ուշադրության կենտրոնում են»,- նշել է Ռուզաննա Զաքարյանը:

Երեխաներն ասել են, որ փառատոնին նախապատրաստվելու օրերին իրենք էլ ավելի լավ են ճանաչել ու սիրել մայրաքաղաքը:

Փառատոնին մասնակից ջոկատները խորհրդանշում էին մայրաքաղաքի վարչական շրջանները։