Առնետավազքը սկսված է

Շրջանառվող լուրերը, թե ՀՀԿ-ից կուսակցականների արտահոսք կա, իրոք, համապատասխանում է իրականությանը:

Այստեղից դուրս եկողների զգալի հատվածին, ում «բարձրանալու» հնարավորություն եւ ակնկալած պաշտոնները ՀՀԿ իշխանության ընթացքում չեն տրվել, համալրում են ՀԱԿ անդամ կուսակցությունների շարքերը: Հեռացողները հուսով են, որ իրենց «երազած» պաշտոններին կհասնեն ՀԱԿ-ում, մանավանդ որ` իշխանությունը վերջին շրջանում կատարում է Կոնգրեսի բոլոր պահանջներն ու ցանկությունները:

Սակայն ՀԱԿ-ում էլ գործերը լավ չեն: ՀՀԿ-ի ինքնամաքրման գործընթացին զուգահեռ, ՀԱԿ-ից էլ շարքերը լքում են «հեղափոխական» թեւի ներկայացուցիչները, ովքեր դեմ էին իշխանության հետ երկխոսությանը: Գաղտնիք չէ, որ այստեղից հիմնական արտահոսքն ուղղված է դեպի նորաստեղծ «Ազատ դեմոկրատներ» կուսակցություն:

Այս ամենի ցայտուն ապացույցը Հանրային հեռուստաընկերության «Հայլուր» լրատվականի պահվածքն է` ցուցադրելով, թե ինչպես է վարչապետը Արթիկում 150 հոգու ՀՀԿ-ի կուսակցական տոմսերը հանձնում, այն դեպքում, երբ այլ կուսակցությունների անդամակցության արարողություններին «փակում է իր տեսախցիկները»: Այն, որ Հանրային հեռուստաընկերությունն օրենքով իրավունք չունի այդպես վարվելու, քանի որ հանրությանն է պատկանում եւ ֆինանսավորվում է ամբողջ հանրության, այլ ոչ թե կոնկրետ քաղաքական ուժի կողմից, արդեն ոչ ոքի չի հետաքրքրում:

Խաղի կանոններն են դաժան, եւ այդ ֆոնին մնում է փաստել, որ ՀՀԿ-ում գործերը, իրոք, այնքան էլ լավ չեն...