Մատենադարանի նոր մասնաշենքը` Անկախության 20-ամյակին նվեր

Անկախության 20-ամյակի օրը` սեպտեմբերի 21-ին, կբացվի Մատենադարանի նոր մասնաշենքը: Հաջորդ օրը կմեկնարկի միազգային հայագիտական գիտաժողով` նվիրված Մեսրոպ Մաշտոցի ծննդյան 1650-ամյակին:

Մատենադարանի փոխտնօրեն Շուշանիկ Ղարիբյանը ԵՐԿԻՐ-ի հետ զրույցում ասաց, որ նոր մասնաշենք կտեղափոխվեն հայագիտական գրադարանը, ձեռագրերի վերականգնողական եւ թվայնացման բաժինը, ընթերցասրահը:

«Հին շենքն ամբողջովին կվերանորոգվի, նորամուծություներ կլինեն` ցուցադրության առումով: Կպահպանվի հիմնական ցուցասրահը, ինչպես նաեւ կլինեն տարբեր շրջանների գրչության կենտրոնների ցուցասրահներ, քանի որ հավաքածուները շատ հարուստ են. անհրաժեշտություն կա ցուցադրելու մեր ձեռագրատան հավաքածուները»,- ասաց տիկին Ղարիբյանը:

Ձեռագրատան գլխավոր ավանդապահ Գեւորգ Տեր-Վարդանյանը նշեց, որ հին մասնաշենքում ընթերցասրահից օգտվում է 65 հոգի, իսկ նոր մասնաշենքի ընթերցասրահից կկարողանան օգտվել 230 հոգի:

Մասնաշենքը ունի բոլոր հնարավորությունները` մատյանները բարվոք վիճակում պահելու համար: Այստեղի ձեռագրերի վերականգնողական բաժինը տարածաշրջանում լավագույնն է. մասնագետները շատ փորձառու են եւ հաճախ հրավիրվում են արտերկիր:

Ձեռագրերի մեծ մասը մագաղաթյա է, դրանք հաճախակի մշակման կարիք ունեն: