Ամենալիբերալ օրենսդրությունն ամբողջ տարածաշրջանում

Հայաստանի ավտոմոբիլային տրանսպորտի ոլորտում գործող օրենսդրությունն ամենալիբերալներից է ամբողջ տարածաշրջանում. այսօր լրագրողների հետ ճեպազրույցում հայտարարեց Հայաստանի տրանսպորտի եւ կապի նախարար Մանուկ Վարդանյանը:

Ըստ նրա` Հայաստանի կառավարությունը որոշել է չլիցենզավորել ավտոմոբիլային բեռնատար փոխադրումները:

«Օտարերկրյա փոխադրողների համար նույնպես նախատեսված են պարզեցված ընթացակարգեր. Հայաստան մուտք գործելու եւ տարանցման համար հատուկ թույլտվություններ չեն պահանջվում: Հայաստանի սահմանին օտարերկրյա քաղաքացիների համար գործում է մուտքի վիզաների տրամադրման պարզեցված համակարգ»,- ասաց նախարարը:

Իսկ Ավտոտրանսպորտի միջազգային միության գլխավոր քարտուղար Մարտին Մարմին հայտնեց, որ յուրաքանչյուր երկիր բաց է դառնում առեւտրի համար այն դեպքում, երբ խթանում է ավտոմոբիլային փոխադրումները: Ըստ նրա` մեր տարածաշրջանում կատարված ուսումնասիրությունները ցույց են տվել, որ փոխադրման ժամանակի 40 տոկոսը կորչում է սահմանի վրա, իսկ ծախսերի 30 տոկոսը, այսպես կոչված, չարտոնված վճարումներն են ճանապարհների տարբեր հատվածներում:

Մ. Մարմին նաեւ հայտնեց, որ իրենց նպատակը տարածաշրջանում մյուս երկրներում հաջողությամբ կիրառվող ընթացակարգերը ներդնելն է: