Թե ինչու, ըստ թուրքերի, ԱՄՆ-ը չպիտի ճանաչի Հայոց ցեղասպանությունը

2007 թվականի մարտի 9-ին ԱՄՆ պետքարտուղարի տեղակալի օգնական Մեթյու Բրայզայի և Ստամբուլի նահանգապետի փոքրամասնությունների գծով տեղակալ Ֆիքրետ Ղասաբօղլուի զրույցի ժամանակ անդրադարձ է եղել հայ-թուրքական հարաբերություններին. տեղեկանում ենք WikiLeaks-ի գաղտազերծած փաստաթղթերից:

Բրայզան ընդգծել է, որ ԱՄՆ վարչակազմը ջանքեր է գործադրում, որ Կոնգրեսի Ներկայացուցիչների պալատը չընդունի Հայոց ցեղասպանությունը ճանաչող բանաձևը, քանի որ համարում է, որ հայ-թուրքական ընդհանուր պատմության խնդիրները պետք է լուծվեն երկու հասարակությունների քննարկումների միջոցով:

Ղասաբօղլուն, իր հերթին,  4 փաստարկ է բերել, թե ինչու ԱՄՆ-ը չպիտի ճանաչի Ցեղասպանությունը:

1. Ստամբուլում հանդուրժողականությունը տարբեր մշակույթների նկատմամբ սկսվել է դեռևս Օսմանյան կայսրության առաջին տարիներից:

2. Չնայած պատմական և ներկայիս քաղաքական լարվածությանը` Թուրքիայում ապօրինաբար ապրում եւ աշխատում են ավելի քան 40000 հայաստանցիներ (փաստաթղթում նշվում է, որ Թուրքիայի կառավարությունը հաճախ խոսում է 70000-ի մասին):

3. Հրանտ Դինքի սպանությունից հետո հազարավոր թուրքեր դատապարտեցին այդ հանցագործությունը, ինչը հարգանքի նշան էր այլ մշակույթների նկատմամբ:

4. Թուրքիայի նոր սերունդը չի հասկանում, թե ինչ է տեղի ունեցել Առաջին համաշխարհային պատերազմի ժամանակ, և 1915 թվականի իրադարձությունների քաղաքականացումն ատելություն կսերմանի: