Գնաճի զսպման համար համակարգային մոտեցում չկա

ԱԺ ՀՅԴ խմբակցության պատգամավոր Արծվիկ Մինասյանի համոզմամբ` գնաճի զսպման ուղղությամբ կառավարության վարած քաղաքականությունն անարդյունավետ է, որովհետեւ հիմնական պատասխանատու համարվող Կենտրոնական բանկն առաջնորդվում է պարզ եւ անարդյունավետ քայլերով. փորձում է միայն փողի քանակի կարգավորմամբ զսպել գնաճը:

Ըստ պատգամավորի`  դա  անարդյունավետ սկզբունք է. «Ցանկացած նման գործողություն առնվազն 50 տոկոսով անարդյունավետ է»:

Ա. Մինասյանի խոսքերով` Հայաստանում գնաճի զսպման համար համակարգային մոտեցում ընդհանրապես չկա եւ համապատասխան մարմինները` Կենտրոնական բանկը, ՏՄՊՊՀ-ն, Հանրային ծառայությունները կարգավորող հանձնաժողովը, միասնական գործելու փոխարեն պատասխանատվությունը գցում են միմյանց վրա:

«Չկա պատասխանատվության գիտակցում, այլ կա պատասխանատվության տեղափողում այլ հարթություն: Դա մեզ թույլ է տալիս ենթադրել, որ ներկա կառավարությունը ժամանակակից մարտահրավերներին արձագանքելու ունակություն չունի»,- ասաց պատգամավորը:

Նա նաեւ նշեց, որ ՀՅԴ-ն ներկայացրել է բազմաթիվ առաջարկություններ, սակայն կառավարությունն անտեսում է դրանք: