Քադաֆին երկխոսության կոչ է անում

Լիբիայի առաջնորդ Մուամար Քադաֆին այսօր առավոտյան հեռուստաեթերից հայտարարել է, որ մտադիր չէ հրաժարական տալ ու լքել երկիրը, սակայն պատրաստ է բանակցությունների եւ հաշտեցման, եթե ՆԱՏՕ-ն դադարեցնի ռմբակոծությունները. տեղեկացնում է Reuters գործակալությունը:

Նա կոչ է արել արեւմտյան կոալիցիային դադարեցնել հարձակումները եւ հնարավորություն տալ Լիբիայի ժողովրդին ինքնուրույն լուծելու ներքին խնդիրները:

«Մենք նրանց վրա չենք հարձակվել, չենք կտրել-անցել ծովը...: Իսկ ինչո՞ւ են նրանք մեզ վրա հարձակվում: Եկեք բանակցություններ սկսենք»,- մոտ 80 րոպե տեւած իր ելույթում ասել է Քադաֆին:

Ելույթի հեռարձակումից անմիջապես հետո պետական հեռուստատեսությամբ հայտարարել են, որ հեռարձակման ժամանակ ՆԱՏՕ-ի ռազմաօդային ուժերը ոչնչացրել են հեռուստաընկերության մոտակայքում գտնվող շինությունը, ինչը «նշանակում է, որ դա առաջնորդի դեմ մահափորձ էր»: