Հայաստանը "պիրատության" 90 տոկոս ցուցանիշ ունի

2010 թ. Microsoft ընկերությանը փոխանցվել է շուրջ 18 հազար ԱՄՆ դոլարին համարժեք դրամ` որպես փոխհատուցում հեղինակային իրավունքների խախտման դիմաց: Դրանք վերաբերում են Microsoft-ի ծրագրերն առանց հատուցման օգտագործելուն: Այս մասին լրագրողների հետ հանդիպման ժամանակ հայտարարեց ամերիկյան տեխնիկա արտադրող ընկերությունների իրավունքներն ու շահերը պաշտպանող «Բիզնես սովթվեր ըլայնս» (BSA ) կազմակերպության Հայաստանում Microsoft-ի իրավունքների եւ շահերի ներկայացուցիչ Նարինե Մկրտչյանը:

«2010թ. դրությամբ` ընկերությունը 18 դիմում է ներկայացրել ՀՀ ոստիկանություն, որոնց բոլորին ընթացք է տրվել: Հիմնականում այդ իրավունքները խախտվում են ձայնասկավառակներ, համակարգիչներ արտադրող խանութների կողմից»,- նշեց Ն. Մկրտչյանը:

Թեւե BSA-ը ծրագրային ապահովման եւ սարքավորումներ արտադրող գործընկերների ձայնն է` ուղղված կառավարությանը եւ միջազգային շուկային, բայց, ինչպես նշեց Ն. Մկրտչյանը, կազմակերպությունը շատ նամակներ է ուղարկել էկոնոմիկայի նախարարություն, սակայն դրանք բոլորը մնացել են անպատասխան, անգամ` մերժում չեն ստացել:

Նարինե Մկրտչյանը նշեց նաեւ, որ Հայաստանը «պիրատության» 90 տոկոս ցուցանիշ ունի: