Սառը ցնցուղը կօգնի՞ գյուղատնտեսությանը

ԱԺ գյուղատնտեսական եւ բնապահպանական հարցերի մշտական հանձնաժողովի նախագահ Խաչիկ Հարությունյանն այսօր լրագրողների հետ հանդիպման ժամանակ ո'չ հերքեց, ո'չ էլ հաստատեց այն լուրերը, թե Ուկրաինայից Հայաստան ներկրվող 2000 տ գարու սերմնացուն փորձաշրջան չի անցել:

«Գյուղատնտեսության փոխնախարարն այժմ Ուկրաինայում է, եւ ինքն է դրանով զբաղվում: Բայց դրանք գարու այն տեսակներն են, որոնք Հայաստանի համար արդյունավետ են»,- ասաց Խ.Հարությունյանը:

Փոխարենը ՕԵԿ-ական պատգամավորն ամենայն եռանդով ու աշխուժությամբ բառ առ բառ մեջբերեց հանրապետության նախագահի վերջին օրերի հանձնարարականները գյուղատնտեսության ոլորտի պատասխանատուներին, անդրադարձավ մարտի 11-ին կայացած «Պարենային անվտանգության մասին» հայեցակարգի քննարկմանը, նաեւ մարտի 12-ի ծաղկաձորյան քննարկումներին եւ ուրախությամբ նշեց, որ երկրի նախագահը կարեւորել է պետական աջակցությունը գյուղատնտեսության ոլորտում:

Բավականին ծեծված նախադասություններ ու մտքեր արտահայտելուց հետո հանձնաժողովի նախագահը խոստովանեց, որ վերջին 10 օրերի քննարկումների արդյունքներն իրեն լավատեսություն են ներշնչում: «Շուտով սկսվելու են գարնան գյուղատնտեսական աշխատանքները. 2000 տ գարու սերմացու է ներկրվելու հանրապետություն, նախատեսվում է եւս 1000 տ, որովհետեւ պահանջարկը մեծ է: Արդեն ճանապարհին է նաեւ 2500 տ կարտոֆիլի սերմացու: Մի խոսքով` այս ամենը մեզ հույս է ներշնչում, որ այս տարի գյուղատնտեսական ոլորտից կարող ենք տնտեսական աճ ակնկալել»,- եզրակացրեց Խ. Հարությունյանը` հուրախություն գյուղացիների նշելով, որ պետությունը նաեւ միջոցներ կներգրավի, որպեսզի գյուղացուն վարկերը տրամադրվեն ցածր տոկոսադրույքներով:

Հետաքրքիր է, մեկ տարի առաջ ե՞ւս նույն լավատեսությամբ էր զինված Խաչիկ Հարությունյանը, երբ գյուղնախարարության ղեկը վստահվեց իր կուսակից Գերասիմ Ալավերդյանին, որի «հերոսությունների» մասին նախընտրում ենք լռել: Իսկ գուցե խնդիրն այն է, որ տարիներ շարունակ այս ոլորտում պատասխանատուներ են նշանակվել մարդիկ, որոնց համար ոլորտն ու նրա հիմնախնդիրները, մեղմ ասած, ընկալելի չեն եղել:

«Մեր կառավարությունն այսօր ձեւավորվում է կոալիցիոն սկզբունքով, բայց հատկապես արդյունաբերության եւ գյուղատնտեսության ոլորտում պետք է լինեն մասնագետ կադրեր, որպեսզի կարողանան ոլորտը կարգավորել եւ կառավարել»,- ասաց Հայրենական ապրանք արտադրողների միության նախագահ Վազգեն Սաֆարյանը` ընդգծելով, որ դրանք չպետք է լինեն քաղաքական պաշտոններ:

Ըստ նրա` նախարարությունները մեզանում զուտ ֆունկցիոնալ բնույթ են կրում, մինչդեռ պետք է լինեն ֆունկցիոնալ ճյուղային: Ինչ վերաբերում է Ս. Սարգսյանի վերջին հանձնարարականներին, ապա Վազգեն Սաֆարյանն ասում է` դա սառը ցնցուղ էր, որ նախագահը մաղեց գյուղատնտեսության ոլորտի պատասխանատուների վրա, եւ պետք է որ դրականորեն ազդի: «Ուշ էր, բայց ոչ ուշացած»,- խոսքը եզրափակեց Սաֆարյանը:

Շուշան ՇԱՀՎԵՐԴՅԱՆ