Եվրոպական յոթ երկիր կօգնի Ուկրաինային՝ պատրաստվելու ձմռանը

Իսլանդիայի, Լատվիայի, Լիտվայի, Նորվեգիայի, Ֆինլանդիայի, Շվեդիայի եւ Էստոնիայի ԱԳՆ ղեկավարները պարտավորվել են օգնել Ուկրաինային՝ պատրաստվելու ձմռանը եւ վերականգնելու նրա էներգետիկ ենթակառուցվածքը։ Այս մասին նշվել է  եվրոպական յոթ երկրների եւ Ուկրաինայի ԱԳՆ ղեկավարների համատեղ հայտարարությունում, որն ընդունվել է Կիեւում կայացած հանդիպման արդյունքներով։

«Մենք կշարունակենք համատեղ աշխատել քաղաքական եւ գործնական աջակցության ցուցաբերման ուղղությամբ՝ ապահովելու համար իր անկախությունը եւ տարածքային ամբողջականությունը պաշտպանելու Ուկրաինայի կարողությունը»,- նշվել է փաստաթղթում։

«Ռուսաստանը պետք է դադարեցնի ագրեսիան եւ դուրս բերի զորքերն Ուկրաինայի ամբողջ տարածքից»,- ասել են ԱԳՆ-ների ղեկավարները։ Նրանք ընդգծել են, որ իրենց երկրները երբեք չեն ընդունի ուկրաինական տարածքների, ներառյալ Ղրիմի, անեքսիայի անօրինական փորձը, եւ հաստատել են Ղրիմի ապաօկուպացմանը հասնելուն ուղղված գործունեության համատեղ ջանքերը։