Ոչ մի թիզ հող չենք զիջել

Այսօր աշխարհի բոլոր բանակներն ունեն բացթողումներ եւ հաջողություններ: Հայաստանն էլ բոլորի նման ե'ւ ուրախանում է իր հաջողություններով, ե'ւ մտածում խնդիրների լուծման ուղղությամբ: «Բայց փորձում ենք դափնիների վրա չնիրհել»,- ԵՊՀ ուսանողների եւ պրոֆեսորադասախոսական կազմի հետ հանդիպման ժամանակ հայտարարեց պաշտպանության նախարար Սեյրան Օհանյանը:

Նախարարն իր խոսքում նշեց, որ ուրախ է ավանդույթ դարձած հանդիպման համար:

Նա կարեւորեց ՊՆ համագործակցությունը տարբեր գերատեսչությունների հետ եւ նշեց, որ այսօր անվտանգության համակարգում լուրջ փոփոխություններ են իրականացվում: Մասնավորապես` հատկանշական է կրթության եւ գիտության նախարարության հետ համագործակցությունը, քանի որ, ինչպես նշեց նախարարը, բանակը պետք է համալրվի կրթված մարդկանցով:

«Հայկական բանակն ունենում է ե'ւ հաջողություններ, ե'ւ անհաջողություններ, սակայն կարողանում է իրականացնել երկրի սահմանների ու ժողովրդի անվտանգության պաշտպանությունը»,- նշեց նախարարը:

Նա հավաստիացրեց, որ այն սադրանքները, դիպուկահարների կրակը կամ դիվերսիոն հետախուզական գործողությունները, որոնք փորձում են իրականացնել մեր հակառակորդները, ստանում են իրենց արժանի հակահարվածն ու պատասխանը, ավելին՝ «առաջին գծում մենք փորձում ենք պարտադրողի դերում լինել»:

«Մինչ օրս հայկական բանակը ոչ մի թիզ հող չի զիջել եւ պատրաստ է իրականացնել իր առջեւ դրված խնդիրները»,- ասաց նախարարը: