«Ոչ մի թիզ հող». ԵԱՀԿ համանախագահներին Արցախում դիմավորեցին բողոքի ակցիայով

ԵԱՀԿ Մինսկի խմբի համանախագահներին, որոնք այսօր մեկնել են Քարվաճառ, այնուհետև Քաշաթաղի շրջկենտրոն Բերձոր, արցախցի երիտասարդներն ու Քաշաթաղի շրջանի բնակիչները դիմավորել են բողոքի ակցիայով և պաստառներով: Այս մասին հայտնում է Karabakh Open ֆեյսբուքյան էջը: 

ՀՅԴ Արցախի երիտասարդական միության նախաձեռնությամբ տեղի ունեցած բողոքի ակցիայի մասնակիցները պահել էին «Ոչ մի թիզ հող», «Հարգեք մեր իրավունքները», «Ոչ մի օտար զինվոր Արցախում», «Դատապարտեք ագրեսորին» և այլ գրություններով պաստառներ:

Նրանք փակել են համանախագահների ճանապարհը՝ պահանջելով իջնել ու պատասխանել իրենց հարցերին: Երիտասարդների հետ հիմնականում զրուցել է ամերիկացի համանախագահ Ջեյմս Ուոլիքը:

Այնուհետև երիտասարները համանախագահներին ուղեկցել են մինչև Քաշաթաղի շրջվարչակազմի շենք, որտեղ տեղի է ունեցել համանախագահների և վարչակազմի ղեկավար Սուրեն Խաչատրյանի հանդիպումը:

Երիտասարդները մնացել են շենքի բակում մինչև հանդիպման ավարտը՝ բարձրախոսով ներկայացնելով իրենց դիրքորոշումը՝ ազատագրված հողերի և արցախյան հիմնախնդրի կարգավորման վերաբերյալ: Հանդիպումը տևել է մոտ 25 րոպե:

Բերձորից համանախագահները մեկնել են Ստեփանակերտ, որտեղ նախատեսված էր հանդիպում ԼՂՀ նախագահի հետ, սակայն ավելի ուշ հայտնել են, որ հանդիպումը չի կայանա: Հնարավոր է՝ հանդիպումը տեղի ունենա վաղը: