Ձյունը կաթվածահար է արել երթեւեկությունը

Այս գիշեր Արցախում տեղացած ձյունը կաթվածահար է արել երթեւեկությունը. մայրաքաղաք Ստեփանակերտում ձյան շերտը 10-15 սմ է, իսկ որոշ տեղերում եւ շրջաններում` 20-25 սմ:

Առավոտից Ստեփանակերտում համարյա հնարավոր չէր երթեւեկել, քանի որ ճանապարհները մաքրված չէին, միայն աղ էր ցանված: Քաղաքում հատուկենտ երթուղայիններ են գործում, մի քանի տաքսիներ ու ավտոմեքենաներ:

Այժմ արդեն սկսվել են ճանապարհների մաքրման աշխատանքները, սակայն տեղումները դեռ չեն դադարել:

Ավելի վատթար վիճակ է հանրապետության շրջաններում: Կառավարությանն առընթեր արտադրական ենթակառուցվածքների վարչության տրանսպորտի բաժնի պետ Տիգրան Գաբրիելյանի հավաստմամբ` չնայած ձյան առատությանը, շրջկենտրոնների հետ կապ կա, սակայն հանրապետության 11 ուղղություններով երթերն այսօր ձախողվել են: