Արգենտինայի Կլիմես քաղաքում՝ ապրիլի 24-ը հիշատակի օր

Բուենոս Այրես նահանգի Կիլմես քաղաքի ավագանին որոշում է կայացրել միանալ 2006թ. դեկտեմբերի 13-ին Արգենտինայի Ազգային կոնգրեսի ընդունած 26.199-րդ օրենքին, որով Ապրիլի 24-ը` ի հիշատակ Հայոց ցեղասպանության զոհերի, հռչակվեց «Հանդուրժողականության եւ ժողովուրդների միջեւ հարգանքի օր»: Ավագանու հատուկ նիստին ներկա էին Արգենտինայում Հայաստանի դեսպան Վլադիմիր Կարմիրշալյանը, Հայ Առաքելական եկեղեցու, Բուենոս Այրեսի հայկական կառույցների ու Կիլմեսում բնակվող մոտ 150 հայ ընտանիքների ներկայացուցիչներ, մտավորականներ, «Խրիմյան» վարժարանի աշակերտներ, լրագրողներ:

Նախաձեռնության հեղինակը` ավագանու անդամ Դիեգո Բուֆֆոնին, ներկայացրեց Օսմանյան կայսրությունում հայերի դեմ գործած հանցագործության պատճառներն ու հետեւանքները: Նա ասաց, որ «հետագայում մարդկության դեմ հանցագործությունները կանխելու համար կարեւոր են երեք հիմնական պահանջներ՝ հիշողություն, ճշմարտություն ու արդարադատություն եւ այսօրվա միջոցառումը հենց այդ նպատակներն է հետապնդում:

Դ.Բուֆֆոնիի առաջարկությամբ ավագանին միաձայն որոշեց միանալ 26.199-րդ Ազգային օրենքին, որն ապրիլի 24-ը հռչակում է հանդուրժողականության եւ ժողովուրդների միջեւ հարգանքի օր` ի հիշատակ հայ ժողովրդի դեմ գործած ցեղասպանության»: Որոշման 2-րդ եւ 3-րդ հոդվածների համաձայն, Կիլմեսում բնակվող ազգությամբ հայ պետական պաշտոնյաները և մունիցիպալ դպրոցի աշակերտները ապրիլի 24-ին «ազատ են արձակվում ցեղասպանության հիշատակման միջոցառումներին մասնակցելու համար»: