Ուժի մեջ է մտել ԵԱՏՄ-ում ապրանքների մակնշման համաձայնագիրը

Մարտի 29-ին ուժի մեջ է մտել Եվրասիական տնտեսական միությունում նույնականացման միջոցներով ապրանքների մակնշման համաձայնագիրը, որը 2018-ի փետրվարի 2-ին Ալմաթիում ստորագրել են ԵԱՏՄ անդամ երկրների կառավարությունների ղեկավարները:

Այ փաստաթուղթը շրջանակային բնույթ է կրում, ինչը թույլ է տալիս ճկուն որոշումներ ընդունել մակնշման կիրառման հարցում ոչ թե սահմանափակ քանակով ապրանքների, այլ արտադրանքների ընդլայնված հատվածի վերաբերյալ:

Համաձայնագրի հիմնական խնդիրը ապրանքների մակնշման գործընթացի միասնականացումն է ԵԱՏՄ ողջ տարածքում: Աժմ սեփական տարածքում մակնշում իրականացնելուց առաջ պետությունը պետք է այս կամ այն ապրանքի մասին առաջարկ ներկայացնի միության բոլոր անդամ երկրների դիտարկմանը: Երեք ամսում հանձնաժողովը դիտարկում է առաջարկը և որոշում կայացնում:

Եթե ընդհանուր համաձայնություն ձեռք չի բերվում, ապա երկու և ավելի երկիր կարող են իրենց օրենսդրության համապատասխան մակնշման գործընթաց իրականացնել՝ ելնելով համաձայնագրում նշված ընդհանուր սկզբունքներից:  

Տվյալ փաստաթղթով ամրագրված կանոնները թույլ կտան ուժեղացնել հսկողությունը ԵԱՏՄ-ում ապրանքաշրջանառության նկատմամբ՝ դրանով իսկ նվազագույնի հասցնելով ստվերային շրջանառությունը: Իսկ սպառողները կստանան երաշխիք, որ իրենց ձեռք բերած ապրանքն օրինական է: