ԵՄ-ն կարող է ճնշել Հայաստանին՝ Ռուսաստանի դեմ քայլեր ձեռնարկելու համար․ եվրապատգամավոր

Եվրոպական միությանը (ԵՄ) անդամակցելու նախապատրաստական փուլում Հայաստանը կարող է ստիպված լինել Ռուսաստանի հետ վիզային ռեժիմ սահմանել և միանալ հակառուսական պատժամիջոցներին։

Այս մասին «Известия»-ին հայտարարել է Եվրոպական խորհրդարանի՝ Հայաստանի հետ խորհրդարանական համագործակցության հարցերով նախկին հանձնաժողովի անդամ Ֆերնան Կարտհայզերը։

«Բրյուսելն օգտագործում է Հայաստանը սեփական աշխարհաքաղաքական շահերի համար, սակայն չի կարող երկիրը պաշտպանել նման քայլերի հնարավոր տնտեսական և քաղաքական հետևանքներից։

Հայաստանի վրա ուժեղ ճնշում կգործադրվի, որպեսզի այն ի վերջո ընդունի այդ միջոցները։ Հուսով եմ՝ Հայաստանը կդիմանա այդ ճնշմանը և առաջին հերթին կառաջնորդվի սեփական շահերով»,-նշել է քաղաքական գործիչը։

Ավելի վաղ Ռուսաստանի արտաքին հետախուզության ծառայությունը հայտարարել էր, որ Բրյուսելը Հայաստանի իշխանություններից պահանջում է խզել կապերը Մոսկվայի հետ, սահմանափակել ռուսական բիզնեսի ներկայությունը և նվազեցնել հումանիտար կապերը՝ վիզային ազատականացման դիմաց։