Կիրիլ Դմիտրիևը խոսել է ԱՄՆ-ի հետ բանակցությունների մասին

Ռուսաստանի ուղղակի ներդրումների հիմնադրամի ղեկավար, Ռուսաստանի նախագահի հատուկ ներկայացուցիչ Կիրիլ Դմիտրիևը Վաշինգտոնում հանդիպումներ է ունեցել ԱՄՆ նախագահ Դոնալդ Թրամփի վարչակազմի ներկայացուցիչների հետ։ Բանակցություններն ընթանում են ՌԴ առաջնորդ Վլադիմիր Պուտինի հանձնարարությամբ ապրիլի 2-ին և 3-ին, հայտնել է Դմիտրիևը Telegram-ի իր ալիքում։ 

Դմիտրիևը նշել է, որ Մոսկվայի և Վաշինգտոնի միջև ամբողջ աշխարհի համար կարևորագույն երկխոսությունը բացարձակապես ավերվել է ԱՄՆ նախկին առաջնորդ Ջո Բայդենի վարչակազմի օրոք։ Պուտինի հատուկ ներկայացուցիչը նաև ուշադրություն է հրավիրել այն փաստի վրա, որ շատ պետություններում կառուցողական համագործակցության վերականգնման ճանապարհին կանգնած են «բազմաթիվ ուժեր, որոնք շահագրգռված են լարվածության պահպանմամբ»: Նրա խոսքով՝ գիտակցաբար խեղաթյուրում են Մոսկվայի դիրքորոշումը, փորձում են խափանել երկխոսության ցանկացած քայլ և այդ նպատակների համար ռեսուրսներ ու ուժեր չեն խնայում։ 

«Ռուսաստանի և ԱՄՆ-ի մերձեցման հակառակորդները վախենում են, որ երկու երկրները ընդհանուր եզրեր կգտնեն, կսկսեն ավելի լավ հասկանալ միմյանց և փոխգործակցություն կառուցել միջազգային գործերում և տնտեսության մեջ», - ընդգծել է Դմիտրիևը:

Նա երկխոսության վերականգնումը բարդ և աստիճանական գործընթաց է անվանել ՝ ընդգծելով, որ «յուրաքանչյուր հանդիպում, յուրաքանչյուր անկեղծ զրույց թույլ է տալիս առաջ շարժվել»: