ՌԴ-ԱՄՆ  հարաբերություններում դրական դինամիկա կա․ Դմիտրիևը մանրամասներ է հայտնել ԱՄՆ-ի հետ բանակցություններից

Արտասահմանյան երկրների հետ ներդրումների և տնտեսական համագործակցության հարցերով ՌԴ նախագահի հատուկ ներկայացուցիչ և Ռուսաստանի ուղղակի ներդրումների հիմնադրամի (RDIF) ղեկավար Կիրիլ Դմիտրիևը հայտնել է, որ Վաշինգտոնում հանդիպել է ԱՄՆ նախագահ Դոնալդ Թրամփի վարչակազմի ներկայացուցիչների հետ։

«Մենք ավելի քան տասը ժամ անցկացրեցինք համատեղ հանդիպումներում: Սա շատ կարևոր էր, քանի որ մենք իսկապես քննարկեցինք ռուս-ամերիկյան հարաբերությունների վերականգնմանն առնչվող հարցերի մի ամբողջ շարք: Մենք տեսնում ենք կուտակված խնդիրները լուծելու վճռականություն: Լավ երկխոսություն ենք վարում, այս երկխոսությունը կշարունակվի»,- ասել է նա:

Դմիտրիևը  նշել է, որ Սպիտակ տան ներկայիս ղեկավարի վարչակազմը իրեն շատ հարգալից է պահում բանակցությունների ընթացքում։

«Մենք քննարկել ենք բազմաթիվ հարցեր, ոչ միայն տնտեսական և ներդրումային, այլ հատկապես Ռուսաստանի և ԱՄՆ-ի միջև հարաբերությունների վերականգնման շուրջ: Կարծում եմ, որ սա չափազանց կարևոր է: Կարևոր է, որ դրանք միայն տնտեսության և ներդրումների հարցեր չեն, դրանք Ռուսաստանի և ԱՄՆ-ի միջև հարաբերությունների հետևողական վերականգնման խնդիրներ են», - ասել է նա։

Դմիտրիևը նշել է, որ ամերիկյան մի շարք ընկերություններ ուզում են վերադառնալ ռուսական շուկա, քննարկվել է նաև համագործակցությունը Արկտիկայի և հազվագյուտ հողային մետաղների վերաբերյալ։ Ինչպես նաև հատուկ ուշադրություն է դարձվել երկու երկրի միջև օդային հաղորդակցության վերականգնման հարցը։

Նախագահի հատուկ ներկայացուցիչը նշել է, որ երկու երկրի հարաբերություններում դրական դինամիկա կա, սակայն, ըստ նրա, կպահանջվեն ևս մի քանի հանդիպումներ, որպեսզի լուծվեն բոլոր տարաձայնությունները, բայց գլխավորն այն է, որ իրենք տեսնում են Թրամփի վարչակազմի և նրա հիմնական ներկայացուցիչների դրական տրամադրվածությունը։

«Մենք արդյունավետ քննարկումներ ենք անցկացնում: Մեր դիվանագետները նաև ուսումնասիրում են հնարավոր զարգացումները: Բայց կասկած չկա, որ նախագահ Թրամփի թիմը ոչ միայն կանխեց երրորդ համաշխարհային պատերազմը, այլև արդեն զգալի առաջընթաց է գրանցել ուկրաինական խնդրի լուծման գործում», - ընդգծել է Կիրիլ Դմիտրիևը:

Դաշնության նախագահի հատուկ ներկայացուցիչն ուշադրություն է հրավիրել այն փաստի վրա, որ Ջո Բայդենի օրոք ԱՄՆ նախկին վարչակազմը չի փորձել երկխոսություն վարել Ռուսաստանի հետ։

Հիշեցնենք՝ ռուս-ուկրաինական պատերազմից ի վեր Կիրիլ Դիմիտրևը առաջին ռուս բարձրաստիճան պաշտոնյան է, որը Միացյալ Նահանգներ է գնացել ու ԱՄՆ վարչակազմի առանցքային պաշտոնյաների հետ հանդիպել։