Իրանը պատրաստ է ԱՄՆ-ի հետ անուղղակի բանակցությունների. Խարազի

Իրանի արտաքին հարաբերությունների ռազմավարական խորհրդի նախագահ Քամալ Խարազին հայտարարել է.

«Այն, ինչ մենք այսօր տեսնում ենք ամերիկյան իսթեբլիշմենթի վարքագծում, հոգեբանական պատերազմն է, որն ուղեկցվում է «կա՛մ պատերազմ, կա՛մ բանակցություններ» քաղաքականության պարտադրմամբ՝ ամերիկյան պաշտոնյաների կողմից հակասական ազդանշանների տարածմամբ։

Պարոն Թրամփի վերջին հայտարարությունները և որոշ ամերիկացի պաշտոնյաների անորոշ ակնարկները նրա նամակին, ինչպես նաև դրա լայն տարածումը արևմտյան և տարածաշրջանային լրատվամիջոցներում նպատակ ունեն ստեղծել պատրանքային լավատեսություն, խառնաշփոթ և երկրում ներքին պառակտման մթնոլորտ։

Ամերիկացիները կարծում են, որ կարող են մեզ ներքաշել բանակցությունների մեջ, որոնց ելքը կանխորոշված է, սակայն Իրանի Իսլամական Հանրապետությունը չի փակել բոլոր ճանապարհները և պատրաստ է անուղղակի բանակցությունների՝ մյուս կողմի դիրքորոշումը գնահատելու, իր պայմանները հայտարարելու և համապատասխան որոշում կայացնելու համար»։