ԱՄՆ-ում հայտնաբերվել է կապիկի ծաղկի նոր ձևով հիվանդացության առաջին դեպքը

Առողջապահության նախարարության ներկայացուցիչները շաբաթ օրը հայտարարել են, որ հաստատվել է ԱՄՆ-ում կապիկի ծաղկի նոր ձևով հիվանդացության առաջին դեպքը, որը հայտնաբերվել է արևելյան Կոնգոյում, հաղորդում է Associated Press-ը:

Կալիֆորնիայի հանրային առողջապահության վարչության տվյալներով, հիվանդը ճանապարհորդել էր Արևելյան Աֆրիկայում, իսկ վերադառնալուց հետո բուժվում է Հյուսիսային Կալիֆորնիայում: Ախտանիշները բարելավվում են, և բնակչության համար վարակվելու հավանականությունը ցածր է։

Տուժածը գտնվում է տանը՝ մեկուսացման մեջ, և բուժաշխատողները նախազգուշական միջոցառման նպատակով պարզում են հարազատների հետ նրա շփումները։

Կապիկի ծաղիկը հազվագյուտ հիվանդություն է, որն առաջանում է վիրուսով վարակվելու հետևանքով: Այն տարածված է Աֆրիկայի շրջաններում, որտեղ մարդիկ վարակվում են կրծողների կամ փոքր կենդանիների կծոցներից: Ավելի մեղմ ախտանիշները կարող են ներառել ջերմություն, դող և մարմնի ցավեր: Ավելի ծանր դեպքերում մարդկանց մոտ կարող են առաջանալ վերքեր դեմքի, ձեռքերի, կրծքավանդակի և սեռական օրգանների վրա:

Այս տարվա սկզբին գիտնականները հայտնել էին Աֆրիկայում կապիկի ծաղիկի նոր ձևի ի հայտ գալու մասին, որը տարածվում է սերտ, այդ թվում՝ սեռական շփման միջոցով: Վիրուսը լայնորեն տարածվել է Արևելյան և Կենտրոնական Աֆրիկայում։