կարևոր
2629 դիտում, 1 տարի առաջ - 2023-04-25 18:11
Հասարակություն

Դիարբեքիրում հարգել են Դանիել Վարուժանի հիշատակը

Դիարբեքիրում հարգել են Դանիել Վարուժանի հիշատակը

Մարդու իրավունքների միության՝ Դիարբեքիրի մասնաճյուղն ակցիա է կազմակերպել, որի շրջանակներում հարգել են նաև Դանիել Վարուժանի հիշատակը։ Akunq.net-ի փոխանցմամբ՝ այդ մասին հաղորդում են թուրքական լրատվամիջոցները։

Աղբյուրի համաձայն՝ ակցիայի մասնակիցները հավաքվել են Դիարբեքիր նահանգի Ռեզան (Բաղլար) գավառում գտնվող Քոշույոլու այգու՝ կյանքի իրավունքը խորհրդանշող հուշակոթողի մոտ և բարձրացրել Թուրքիայում անհետ կորած անձանց, այդ թվում՝ արևմտահայ բանաստեղծ Դանիել Վարուժանի ճակատագրի հարցը։ Նրանց կողմից ցուցադրված լուսանկարների շարքում տեղ է գտել նաև 1915 թ․ Դանիել Վարուժանի պատկերը։

Մարդու իրավունքների միության՝ Դիարբեքիրի մասնաճյուղի Անհետ կորածների հարցով հանձնաժողովի անդամ Ֆըրաթ Աքդենիզը, «Չենք մոռացել, չենք մոռանալու» շեշտելով, ներկայացրել է Դանիել Վարուժանի պատմությունը։ Նա մասնավորապես հայտնել է, որ Վարուժանը գտնվել է 1915 թ․ ձերբակալված անձանց մեջ, Վարուժանին նախ տարել են մոտակա ոստիկանական տեղամաս, ապա՝ փոխադրել կենտրոնական կալանատուն։

Աքդենիզը նաև նշել է․ «1915 թ․ ապրիլի 25-ին առանց ձերբակալվածներին որևէ տեղեկություն տալու՝ Հայդարփաշա կայարանից նրանց մասնավոր գնացքով ուղարկել են Անկարա։ 158 հոգանոց խումբը տարվել է Չանքըրը, իսկ 92 հոգանոցը՝ Այաշ։ Կալանավորված այդ անձանցից 174-ը ներկայում մի գերեզմանաքար անգամ չունի»։

Աքդենիզը նաև հավելել է, որ ապրիլի 24-ին Ստամբուլում ձերբակալված այդ դեմքերից մեկն էլ եղել է «չքավորության, ճակատի քրտինքի, աշխատանքի, սիրո և հայրենասիրության երգիչ» Դանիել Վարուժանը։ Ելույթի վերջում բանախոսը հակիրճ ներկայացրել է Դանիել Վարուժանի կենսագրությունը։

https://www.birgun.net/haber/kayip-yakinlari-kaybettirilen-sair-tanile-varujanin-akibetini-sordu-430977

Թարգմանեց Մելինե Անումյանը