Երեխեքը փող էին դրել՝ ջուր էին քաշել իրենց զորամասում․ «Հրապարակ»

«Հրապարակ» թերթը գրում է.

Ազատ գյուղում մահացած վանաձորցի Արամ Մանուկյանի պապիկը` Արտյոմ Գրիգորյանը, մեզ հետ զրույցում պնդում է` տղաները չեն վառվել, վառել են: Նրա խոսքով` բանակում անտերություն է, սակայն իրենք չեն պատրաստվում ներել, առավել եւս՝ հանդուրժել մեղավորներին։ «Մինչեւ Եվրոպական դատարան գնալու ենք, չենք թողնելու այսպես»,- ասում է Արամի պապիկը:

- Քննչական կոմիտեի տարածած հաղորդագրության համաձայն` վառարանը բենզինով վառելու հետեւանքով է հրդեհ բռնկվել: Սակայն ոմանք չեն հավատում Քննչական կոմիտեի տարածած հաղորդագրությանը:

- Չէ, նման բան չկա, դրանք լրիվ դավաճաններ ու մարդասպաններ են, էդ հայտարարողներն էլ են մարդասպան, հենց իրենք են սպանել:

- Ինչո՞ւ եք այդպես ասում, ո՞վ է սպանել:

- Ես եղել եմ դիահերձարանում, տվյալների համաձայն՝ երեխան ինչ դիրքով որ պառկած է եղել, էդ դիրքով էլ վառվել է: Տեղից վեր չեն կացել, ինչ դիրքով քնել՝ էդ դիրքով էլ վառվել են: Որ ասում են՝ տեղներից հելել են, սուտ ա, հեքիաթ: Ես կանգնեմ էդ սենյակի մեջտեղում, հինգ լիտր բենզին որ իմ վրա լցնեն, վեր կկենամ կգնամ….

- Բայց ո՞վ կարող էր տղաներին սպանել, ինչո՞ւ:

- Մարդասպանը բանակն ա: Իրենց միջից։ Թե որ մի աֆիցերն ա եղել, ես չգիտեմ:

- Հիմա դուք ի՞նչ քայլեր եք ձեռնարկում:

- Բողոքարկելու եմ, մինչեւ Եվրոպական դատարան գնալու ենք: Ես հիմա գնում եմ մեկ այլ ծնողի հետ հանդիպման, պիտի պայմանավորվենք, հասկանանք՝ ինչ ենք անում:

- Արամի թաղմանը բանակից կամ իշխանություններից որեւէ մեկը ներկա եղե՞լ է:

- Ոչ, Րաֆֆի Հովհաննիսյանից բացի որեւէ մեկը չի եկել:

- Պետությունից որեւէ ֆինանսական օժանդակություն ստացե՞լ եք:

- Որոշակի ծախսեր՝ թաղման հետ կապված։ Ես չէի ընդունում, ասացին, որ պետական ծախս է, պետք է անեն: Տարան երկու տարի թունավորեցին ու վառեցին: Բանակում բարդակ ա: Ես ամեն տեղ չեմ եղել, այնտեղ, որտեղ իմ թոռն է եղել, երեխեքն իրենց լավ էին զգում, զինվորը, որ գլխին տեր չունենա, լավ կզգա…. էդ ա վիճակը:

- Այդ զորանոցում տեղեկացանք, որ խմելու ջուր չի եղել, զինվորներից երկուսը գնացել են աղբյուրից ջուր բերելու:

- Խմելու ջուր կար քաշած, մի տասն անգամ ես եղել եմ էնտեղ: Երեխեքը փող էին հավաքել, նոր ջրագիծ փորել:

- Զինվո՞րն էր փող ծախսել ջրագիծ քաշելու համար:

- Երեխեքը փող էին դրել, ջուր էին քաշել: Իրենց մոտ միշտ շշով ջրեր են դրված եղել նաեւ:

- Ձեր կարծիքով՝ ո՞վ է այս ողբերգության պատասխանատուն, մի քանի զինվորականներ հեռացվեցին աշխատանքից:

- Պաշտպանության նախարարը եթե մարդ է, պիտի ասեր՝ էսքան երեխա մահացավ, առանց թուրքի հետ կռվելու, ավելի լավ է՝ ես հրաժարական տամ: Չտվեց: Ալեն Սիմոնյանն ասում է՝ պատժել ենք մի քանիսին: Ի՞նչ եք արել, տեղակալներին հանե՞լ եք, չհասկացա՝ տեղակալներին հանելը եղավ պատի՞ժ: Մի երկուսին նստացրեք, չէ՞ որ 15 հոգի սպանվեցին: Էդ ի՞նչ եք խոսում, նստել եք տեղներդ: Անձամբ դիմելու եմ հետաքննություն սկսելու համար, մինչեւ Եվրոպական դատարան դիմելու եմ: Սրանք արդեն ծածկադմփոց արեցին: Ծածկադմփոցը եղավ էն ժամանակ, երբ Փաշինյանն ասաց՝ կանիստրը շփոթել են: Գլուխս ցավում ա, էլ սրանցից գլուխ չեմ հանում:

Առավել մանրամասն՝ թերթի այսօրվա համարում։