Ղազախստանում ընթանում են խորհրդարանի Սենատի ընտրությունները

Ղազախստանում այսօր՝ հունվարի 14-ին, ընթանում են խորհրդարանի Սենատի 20 պատգամավորների ընտրությունները, հաղորդում է Kazakhstan Today-ը:

Խորհրդարանի Սենատի պատգամավորներին ընտրում են Ղազախստանի քաղաքացիները, որոնք մասլիխատների պատգամավորներն են (մասլիխատը տեղական ներկայացուցչական մարմին է-խմբ.)։  

ԿԸՀ տվյալներով՝ քվեաթերթիկներում ընդգրկված է 55 թեկնածու։

Սենատի պատգամավոր կարող է դառնալ 30 տարին լրացած, բարձրագույն կրթությամբ եւ առնվազն հինգ տարվա աշխատանքային ստաժ ունեցող անձը, որը մշտապես բնակվում է համապատասխան մարզի, հանրապետական նշանակության քաղաքի կամ մայրաքաղաքի տարածքում առնվազն երեք տարի: Սենատորներն ընտրվում են վեց տարի ժամկետով, կեսը վերընտրվում է երեք տարին մեկ:

Թեկնածուների առաջադրումը սկսվել է 2022 թվականի նոյեմբերի 29-ին եւ ավարտվել դեկտեմբերի 14-ին՝ ժամը 18։00-ին։ Նախընտրական քարոզչությունը տեղի է ունեցել դեկտեմբերի 24-ից մինչեւ հունվարի 13-ի ժամը 00:00-ն (19 օր):