կարևոր
3418 դիտում, 1 տարի առաջ - 2023-01-05 16:37
Քաղաքական

Լոս Անջելեսի քաղաքային կառավարման խորհուրդը պահանջում է ԱՄՆ նախագահից քայլեր ձեռնարկել Արցախի ժողովրդին օգնելու համար

Լոս Անջելեսի քաղաքային կառավարման խորհուրդը պահանջում է ԱՄՆ նախագահից քայլեր ձեռնարկել Արցախի ժողովրդին օգնելու համար

Լոս Անջելեսի քաղաքային խորհրդի նախագահ Փոլ Գրիգորյանն ու Լոս Անջելեսի քաղաքապետ Քերըն Բասը համատեղ հաղորդագրություն են ուղարկել Սպիտակ տուն՝ ԱՄՆ նախագահ Ջո Բայդենից պահանջելով հրատապ միջոցներ ձեռնարկել Արցախի ժողովրդի իրավունքները պաշտպանելու, նրանց անվտանգությունն ապահովելու և Ալիևի հանցավոր ռեժիմին պատասխանատվության ենթարկելու համար:

Համահայկական հարցերի Newsroom լրատվականում Վրույր Թադևոսյանի հետ հարցազրույցի ժամանակ Լոս Անջելեսի քաղաքային խորհրդի նախագահ Փոլ Գրիգորյանը, մեկնաբանելով Արցախի շրջափակման խնդիրը, ընդգծել է՝ սա ալիևյան ռեժիմի շարունակական պատերազմական հանցագործությունների հերթական քայլն է. «Այս պահին երկու անձ կա ամբողջ աշխարհում, որ կարող է խնդիրը լուծել և Արցախի ժողովրդի անվտանգությունն ապահովել, վերջ դնել հրադադարի ռեժիմի այս խախտմանն ու ապաշրջափակել Լաչինի միջանցքը։ Խոսքը Վլադիմիր Պուտինի և Ջո Բայդենի մասին է։ Ես, ցավոք, ազդեցություն չունեմ Պուտինի վրա, բայց հույս ունեմ, որ ամերիկացի ժողովրդի հետ՝ միասին կարող ենք պահանջել Բայդենից, որպեսզի հստակ գործողությունների դիմի և Ամերիկան ոտքի կանգնի պայքարի մեջ հայտնված այն ժողովրդավարական արժեքների համար, որոնք մենք առաջ ենք մղում ամբողջ աշխարհում»,- հարցազրույցի ընթացքում նշել է Փոլ Գրիգորյանն ու հավելել, որ իր այս նախաձեռնությանն է միացել նաև Լոս Անջելեսի քաղաքապետն ու միասին պահանջում են ԱՄՆ նախագահից երկխոսել ամերիկահայ համայնքի հետ, նախաձեռնել հրատապ աջակցություն Արցախի ժողովրդին, պատասխանատվության ենթարկել Ադրբեջանին այս ռազմական հանցագործությունների և ժողովրդավարական արժեքների ոտնահարմար համար։