Ռուսաստանը կարող է պաշտոնապես պատերազմ հայտարարել Ուկրաինային մայիսի 9-ին. CNN

Ռուսաստանի նախագահ Վլադիմիր Պուտինը կարող է պաշտոնապես պատերազմ հայտարարել Ուկրաինային արդեն մայիսի 9-ին։ Այս կարծիքն ունեն ամերիկացի և արևմտյան պաշտոնյաները. հայտնում է CNN-ը։

Ըստ նրանց՝ դա հնարավորություն կտա լիովին մոբիլիզացնելու ռուսական պահեստային ուժերը Արևելյան և Հարավային Ուկրաինան գրավելու փորձի ժամանակ:

Արևմտյան պաշտոնյաները վաղուց հավատում էին, որ Պուտինն օգտագործելու է օրվա խորհրդանշական իմաստը և քարոզչական արժեքը, որ հայտարարի Ուկրաինայում ռազմական ձեռքբերումների, ռազմական գործողությունների սրման մասին։

Պաշտոնյաները սկսել են քննարկել մեկ սցենար, այն է՝ Պուտինը պաշտոնապես պատերազմ է հայտարարելու Ուկրաինային մայիսի 9-ին։ Իսկ ռուսաստանցի պաշտոնյաները ներկայումս պնդում են, որ հակամարտությունը պարզապես «հատուկ ռազմական գործողություն է»՝ «դենացիֆիկացման» նպատակով։

Մայիսի 9-ի մյուս տարբերակները ներառում են Լուգանսկի և Դոնեցկի օկուպացված տարածքների բռնակցումը, Օդեսայի վրա հարձակման ուժեղացումը կամ Մարիուպոլի  նկատմամբ ամբողջական վերահսկողության հռչակումը:

ԱՄՆ պետդեպարտամենտի խոսնակ Նեդ Փրայսը հայտարարել է, որ կան «հարգելի պատճառներ՝ ենթադրելու, որ ռուսներն ամեն ինչ կանեն մայիսի 9-ը քարոզչական նպատակներով օգտագործելու համար»։

«Մենք տեսել ենք, որ ռուսներն իսկապես կրկնապատկում են իրենց քարոզչական ջանքերը, հավանաբար, գրեթե անկասկած,  Ուկրաինայի մարտադաշտում իրենց մարտավարական և ռազմավարական ձախողումներից ուշադրությունը շեղելու համար»,- ասել է Փրայսը ճեպազրույցում: